Përveç Rafael Leaos, autor i një dygolëshi, protagonisti tjetër i madh i fitores 4-0 të së dielës ndaj Napolit ishte padyshim Brahim Diaz, autor i një goli, i një asisti dhe i shumë lojërave të bukura. Spanjolli ishte një nga risitë taktike të Stefano Piolit në Maradona: numri 10 i rosoner, në fakt, nuk luajti si zakonisht, si mesfushor sulmues qendror, por nisi anësor, nga e djathta. Ky pozicion i shkaktoi shumë telashe skuadrës së Luciano Spallettit që vuajti shumë gjatë gjithë kohës që Diaz ishte në fushë.
VAZHDIMËSI – Në fakt, nuk ka pasur asnjëherë dyshime për cilësitë e Brahimit, ndërkohë që duhet të përmirësohet shumë përsa i përket vijimësisë sepse shumë shpesh alternon ndeshjet e shkëlqyera me paraqitje zhgënjyese. Përfundimi i këtij sezoni do të jetë i rëndësishëm edhe për të ardhmen e tij: më 30 qershor, në fakt, do të skadojë huazimi dyvjeçar nga Real Madridi dhe palët e përfshira do të duhet të vendosin se çfarë të bëjnë.
NEGOCIATË E RE? – Në verë, Milani do të ulet në tavolinë me klubin spanjoll për të kuptuar nëse ekziston mundësia e blerjes përfundimisht të Diazit, por me një shifër më të ulët se 22 milionë euro të rëna dakord dy vjet më parë si pjesë e huazimit dyvjeçar për shpagim. Padyshim themelor do të jetë vullneti i lojtarit, i cili e di mirë se te rosonerët mund të gjejë ende shumë hapësirë, ndërsa te Reali do t’i duhej praktikisht të rifillonte nga e para.