Negociatat për rinovimin e kontratës së Rafael Leaos nuk kanë nisur ende pasi ka disa gjëra për të zgjidhur, siç tha vetë lojtari. Nuk është vetëm një çështje për t’u marrë vesh për pagën.
Në lojë është edhe dëmshpërblimi i famshëm ndaj Sportingut për zgjidhjen e njëanshme të kontratës së ushtruar më 2018. Pasi u çlirua, Leao kaloi me kosto zero euro te Lille, nga ana tjetër edhe ajo e dënuar nga CAS i Lozanës për të paguar gjysmën e 20.3 milionë eurove. Kjo telenovelë po ndikon goxha edhe në negociatat mes Milanit dhe shoqëruesve të futbollistit.
Gjoba e Rafael Leaos: lëvizjet e Sporting dhe Lille
Edhe pse janë dhënë vendime, çështja nuk është mbyllur aspak. Siç shpjegohet në Portugali nga kolegët e të përditshmes A Bola, Sporting dhe Lille kanë kërkuar nga FIFA motivet e dënimit. Kur të marrin njoftimin për vendimin, do të kenë 21 ditë kohë për të bërë ankimim.
Sporting që në fillim ka kërkuar të kompensohej për 45 milionë euro, ose shumën që korrespondonte me klauzolën çliruese të Leaos në atë kohë. Klubi i Lisbonës po bën presion për të marrë këtë shumë, 20.3 milionë të vendosura nga gjykata tani nuk i mjaftojnë, pavarësisht se janë një goxha shumë.
Ndërsa Lille kërkon të shmangë pagesën e një pjese të gjobës dhe shpreson që të paktën të ulet shuma. Ishte CAS i Lozanës që e konsideroi bashkërisht përgjegjës dhe e dënoi të merrte pjesë në pagesë së bashku me Leaon. Të shohim nëse do të shkruhen kapituj të rinj të kësaj historie të ndërlikuar.
Përse Rafa u largua nga Sportingu
Më 15 maj 2018, një lajm shock vjen nga Portugalia. Rreth pesëdhjetë ultras të maskuar me kapuçonë hynë në qendrën sportive të Sporting dhe sulmuan disa lojtarë dhe disa anëtarë të stafit teknik. Një lloj ekspedite ndëshkuese pas humbjes zhgënjyese në kampionat ndaj Maritimos.
Dikush kërcënoi se do të largohej duke vendosur të zgjidhë kontratën për arsye të drejtë. Njëri nga ata që e bëri realitet atë gjë ishte Rafael Leao, i cili pasi u çlirua nga klubi i Lisbonës më pas u transferua me kosto zero euro në Lille. Një lëvizje që Sporting e dënoi dhe për të cilën vendosi të niste një proces gjyqësor për të marrë dëmshpërblim që korrespondon me klauzolën 45 milionëshe në kontratë.